മുളക്കുഴ
ഗ്രാമ പഞ്ചായത്ത്

മുളക്കുഴ ഗ്രാമപഞ്ചായത്ത്
2024-25 സാമ്പത്തിക വർഷ ഓഡിറ്റ് റിപ്പോർട്ട് സംബന്ധിച്ച റിപ്പോർട്ട്

മുളക്കുഴ ഗ്രാമപഞ്ചായത്തിന്റെ 2024-25 സാമ്പത്തിക വർഷത്തെ ഓഡിറ്റ് കേരള സംസ്ഥാന ഓഡിറ്റ് വകുപ്പ് നടത്തി റിപ്പോർട്ട് സമർപ്പിച്ചിട്ടുള്ളതാണ്. ഓഡിറ്റ് റിപ്പോർട്ടിൽ പഞ്ചായത്തിന്റെ വാർഷിക ധനകാര്യ പത്രിക പൊതുവെ സത്യസന്ധവും ന്യായവുമായ സാമ്പത്തിക ചിത്രം നൽകുന്നതായി അഭിപ്രായപ്പെട്ടിട്ടുണ്ടെങ്കിലും വിവിധ വിഷയങ്ങളിൽ അപാകതകളും നിർദ്ദേശങ്ങളും ചൂണ്ടിക്കാണിച്ചിട്ടുണ്ട്.

ഓഡിറ്റിൽ വിവിധ ബാങ്ക് അക്കൗണ്ടുകൾ ഇടപാടുകളില്ലാതെ തുടരുന്നതായും, നിലവിലില്ലാത്ത അക്കൗണ്ടുകൾ വാർഷിക കണക്കിൽ ഉൾപ്പെട്ടിരിക്കുന്നതായും കണ്ടെത്തിയിട്ടുണ്ട്. ധനകാര്യ കമ്മീഷൻ ഗ്രാന്റുകളുടെ കണക്കുകളിൽ പൊരുത്തക്കേടുകളും ബാങ്ക് റീക്കൺസിലിയേഷനിലെ അപാകതകളും രജിസ്റ്ററുകളുടെ അപര്യാപ്തമായ പരിപാലനവും ഓഡിറ്റ് ചൂണ്ടിക്കാണിച്ചിട്ടുണ്ട്.

വസ്തു നികുതി ഡിമാൻഡ്, കളക്ഷൻ, ബാലൻസ് എന്നിവ വാർഷിക കണക്കുകളുമായി പൊരുത്തപ്പെടാത്തതും, മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയുടെയും ശുചിത്വ മിഷൻ ഗ്രാന്റിന്റെയും കണക്കുകളിൽ വ്യത്യാസങ്ങൾ നിലനിൽക്കുന്നതായും റിപ്പോർട്ടിൽ പരാമർശിച്ചിട്ടുണ്ട്.

ഗ്രാമപഞ്ചായത്തിൽ വസ്തു നികുതി പരിഷ്കരണ പ്രവർത്തനങ്ങൾ പൂർണ്ണമായി നടപ്പിലാക്കിയിട്ടില്ലെന്നും, മൊബൈൽ ടവറുകൾക്ക് വസ്തു നികുതി നിർണ്ണയിച്ച് ഈടാക്കിയിട്ടില്ലെന്നും ഓഡിറ്റ് നിരീക്ഷിച്ചിട്ടുണ്ട്. കൂടാതെ വിവിധ സ്ഥാപനങ്ങളിൽ നിന്നും ജീവനക്കാരുടെ തൊഴിൽ നികുതിയും സ്ഥാപന തൊഴിൽ നികുതിയും പൂർണ്ണമായി ഈടാക്കിയിട്ടില്ലെന്ന് കണ്ടെത്തിയിട്ടുണ്ട്.

ലൈസൻസ് നൽകൽ നടപടികളിലും അപാകതകൾ കണ്ടെത്തിയിട്ടുണ്ട്. പഞ്ചായത്തിന്റെ പരിധിയിലുള്ള എല്ലാ സ്ഥാപനങ്ങൾക്കും ലൈസൻസ് നൽകിയിട്ടില്ലെന്നും, ലൈവ് സ്റ്റോക്ക് ഫാമുകൾക്കും വളർത്തുനായകൾക്കും നിയമാനുസൃത ലൈസൻസ് അനുവദിക്കുന്നതിൽ കുറവുകൾ നിലനിൽക്കുന്നതായും റിപ്പോർട്ട് വ്യക്തമാക്കുന്നു.

ആഭ്യന്തര നിയന്ത്രണ സംവിധാനം കൂടുതൽ ശക്തിപ്പെടുത്തേണ്ടതിന്റെ ആവശ്യകതയും ഓഡിറ്റ് റിപ്പോർട്ട് ചൂണ്ടിക്കാണിക്കുന്നു. വസ്തു നികുതി പരിഷ്കരണം, ലൈഫ് ഭവന പദ്ധതികളുടെ നിരീക്ഷണം, നിക്ഷേപ പ്രവൃത്തികളുടെ സമയബന്ധിത പൂർത്തീകരണം, ആസ്തി രജിസ്റ്റർ കാലികമാക്കൽ, ടെൻഡർ രജിസ്റ്റർ പരിപാലനം തുടങ്ങിയ വിഷയങ്ങളിൽ പ്രത്യേക ശ്രദ്ധ നൽകണമെന്ന് നിർദ്ദേശിച്ചിട്ടുണ്ട്.

ഓഡിറ്റ് റിപ്പോർട്ടിൽ പരാമർശിച്ചിട്ടുള്ള അപാകതകൾ പരിഹരിക്കുന്നതിനും ആവശ്യമായ തുടർനടപടികൾ സ്വീകരിക്കുന്നതിനും സെക്രട്ടറിയെ ചുമതലപ്പെടുത്തുന്നതിനും, സ്വീകരിച്ച നടപടികളുടെ റിപ്പോർട്ട് ഭരണസമിതിക്ക് സമർപ്പിക്കുന്നതിനുമായി വിഷയം ഭരണസമിതിയുടെ പരിഗണനയ്ക്ക് സമർപ്പിക്കുന്നു.